“BP-Azerbaijan” şirkəti ACG üzrə hesabatlarında bəzi yanlışlıqlara yol verib
Bunu Caspian Barrel Neft Araşdırmalar Mərkəzi “BP Azerbaijan” şirkətinin 2016-cı ilin 3 rübünün yekunlarına dair hesabatını təhlil edərkən üzə çıxarıb.
BP hesabatında bildirilir ki, “doqquz ay ərzində AÇG-dən ümumi hasilat gündə orta hesabla 644 000 barel və ya ümumilikdə 176 milyon bareldən artıq, yəni 24 milyon ton təşkil edib”.
Caspian Barrel 9 ayda 274 günün olduğunu nəzərə almaqla ümumi hasilatın 176 milyon 456 min barel olduğunu üzə çıxarıb, bu isə 23,8 milyon tondur.
“BP-Azerbaijan” şirkəti 2015-ci ilin 9 ayının yekunlarına həsr olunmuş hesabatında hasilatla bağlı bunları dərc etmişdi: “Doqquz ay ərzində AÇG-dən ümumi hasilat gündə orta hesabla 640 000 barel və ya ümumilikdə 175 milyon barel, yəni 24 milyon ton təşkil edib”.
Caspian Barrel diqqəti məhz bu fakta çəkir ki, BP-nin ictimiyyət üçün açıqladığı məlumatlara görə, gündəlik hasilatın 4 min barel dəyişməsi və bu il fevralın 29 gündən ibarət olmasının tonla ümumi hasilata heç bir təsiri olmayıb. Barelə gəldikdə isə fərq cəmi 1 milyon olub. Və bu 1 milyon barel tonda öz əksini tapmır.
Bəs əslində ötən ilin müvafiq dövrü ilə müqayisədə hasilat göstəriciləri necə olub?
Caspian Barrel-in təhlili göstərdi ki, 2015-ci ilin 9 ayında BP və tərəfdaşları AÇG-dən 174 milyon 720 min barel neft hasil ediblər. Bu isə 23,6 mln ton deməkdir.
Yəni ötən ilin müvafiq dövrü ilə müqayisədə “əsrin müqaviləsi” çərçivəsində neft hasilatı ümumilikdə 1,736 milyon barel (233,8 min ton) artıb. Bu isə hasilatın tempinin 0,62 faiz artımı deməkdir.
Ona görə də bu gün həm ölkə KİV-ləri, həm də xarici KİVlər AÇG-də hasilatın ötən ilin müvafiq dövrlə müqayisəsində çox böyük çətinliklərlə üzləşiblər. Ancaq bu, onların günahı deyil, çünki BP nədənsə son illər, həmişə ictimaiyyət üçün açıqlamalarını yuvarlaqlaşdırılmış rəqəmlər üzərində qurur və bunlar da göründüyü kimi bəzən maraqlı təzadlar yaradır. Halbuki BP, AÇG layihəsinin operatoru kimi Azərbaycan Dövlət Neft Şirkətinə gündəlik və aylıq məlumatları həm barellə, həm də tonla heç bir yuvarlaqlaşdırılma edilmədən göndərir və BP-nin müvafiq strukturlarında bu məlumatlar dəqiqliklə var.
Neft Araşdırmalar Mərkəzi bu məsələni bir neçə dəfə BP qarşısında qaldırıb, onların “Davamlı inkişaf hesabatları”nda dəqiq statistikadan istifadənin vacibliyini vurğulasa da, nədənsə bu təşəbbüs hələ də həyata keçməyib.
