SOCAR (Azərbaycan Dövlət Neft Şirkəti) 2016-cı ilin əvvəlində H.Əliyev adına Bakı Neft Emalı Zavodunda (BNEZ) modernləşmə işlərinə başlamağı planlaşdırır. Bu barədə “SOCAR OGPC” şirkətinin baş direktorunun müavini Emil Alxaslı çərşənbə günü “MDB neft emalı və neft-kimya həftəsi” XIX illik konfransında çıxışı zamanı bildirib.
“Bu işlərin məqsədi zavodda yüksək keyfiyyətli neft məhsullarının istehsalının təşkilindən ibarətdir. Planlara əsasən, 2019-cu ilin II rübündə BNEZ-də Avro-5 standartı üzrə dizel yanacağı, 2020-ci ilin ikinci rübündə Avro-5 standartı üzrə benzin istehsalına başlamaq planlaşdırılır. 2016-ci ilin ikinci rübündə zavodda yeni bitum qurğusunda bitum istehsalına start veriləcək”, – deyə o qeyd edib.
Alxaslının sözlərinə görə, modernləşmə işlərindən sonra BNEZ-də illik 2,2 mln. ton avtomobil benzini, 3 mln. ton dizel yanacağı, 1 mln. ton kerosin istehsal olunacaq.
Modernləşmədən sonra zavodda buraxılacaq neft məhsullarının istehsalı strukturunda 37% dizel yanacağı, 25% avtomobil benzini, 13% kerosin, qalan 25% digər növ neft məhsullarının payına düşəcək.
“Bu layihənin reallaşdırılması, ilk növbədə ölkənin gələcək 15-20 il üçün avtomobil benzininə olan daxili tələbatını ödəməyə imkan verəcək”, – deyə o vurğulayıb.
Alxaslı daha sonra bildirib ki, layihənin reallaşdırılması çərçivəsində bazar öyrənilib, texniki-iqtisadi əsaslandırılma hazırlanıb, bəzi əsas qurğular üzrə lisenziarlar seçilib və bu yaxınlarda qalan qurğular üzrə lisenziarlar seçiləcək, topoqrafik və geomaqnit tədqiqatlar başa çatmaq üzrədir.
