SOCAR (Azərbaycan Dövlət Neft Şirkəti) Bakının Qaradağ rayonunda yeni neft-qaz emalı və neft-kimya kompleksinin (OGPC) tikintisi layihəsinin birgə reallaşdırılması üçün tərəfdaş investor cəlb etməyi planlaşdırır. Bu barədə SOCAR-ın strateji inkişaf üzrə vitse-prezidenti Tofiq Qəhrəmanov dünən Bakıda keçirilən “Caspian Oil&Gas 2015” konfransında çıxışı zamanı bildirib.
“Bir neçə şirkət bu layihədə tərəfdaş investor qismində iştirakla bağlı təkliflərini təqdim ediblər. Bununla əlaqədar SOCAR potensial tərəfdaşlarla müvafiq danışıqlara başlayıb”, – deyə o qeyd edib.
Qəhrəmanovun sözlərinə görə, danışıqların uğurla başa çatacağı təqdirdə layihənin digər mərhələləri seçilmiş tərəfdaş investorla birgə həyata keçiriləcək.
Xəbər verildiyi kimi, OGPC kompleksinin tikinti layihəsi iki mərhələdə həyata keçiriləcək, birinci mərhələdə qaz emalı zavodu və neft-kimya zavodunun tikintisi, ikinci mərhələdə neft emalı zavodunun tikintisi nəzərdə tutulub. Birinci mərhələ çərçivəsində tikinti işləri 2015-2020-ci illəri əhatə edəcək.
I mərhələnin dəyəri $7 mlrd. təşkil edir və onun 30%-nin dövlət vəsaiti, 70%-nin isə borc vəsait hesabına maliyyələşdirilməsi planlaşdırılır. Kreditlər üzrə faizlərin ödənilməsi nəzərə alınmaqla ümumilikdə bu layihənin dəyəri $8,45 mlrd. təşkil edir. Birinci mərhələnin gəlirliliyi 20%-dən çox, investisiya xərclərinin çıxarılma müddəti 4-5 ildir.
Birinci mərhələdə illik istehsal gücü 12 mlrd. kubmetr olan qaz emalı zavodunun və ildə 860 min ton polimer (yüksək və aşağı sıxlıqlı polietilen və polipropilen) istehsalını nəzərdə tutan neft-kimya zavodunun, avtonom enerji bloku daxil olmaqla ümumi zavod təsərrüfatının tikintisi planlaşdırılır.
8,6 mln. ton gücə malik yeni NEZ-in 2030-cu ildə istismara verilməsi nəzərdə tutulur. Neftin emal dərinliyi 95%-ə, açıq neft məhsullarının çıxımı 85%-ə çatacaq.
