SOCAR (Azərbaycan Dövlət Neft Şirkəti) H.Əliyev adına Bakı Neft Emalı Zavodunda (BNEZ) yeni layihələrin həyata keçirilməsinə start verib.
Caspian Barrel SOCAR-ın mətbuat xidmətinə istinadən xəbər verir ki, “Avro-5” standartlarının tətbiqi ilə bağlı tədbirlərin sürətləndirilməsi ilə əlaqədar ölkədə fəaliyyət göstərən neftayırma müəssisələrində yenidənqurma işlərinə başlanılıb.
Müvafiq proqrama əsasən, zavodun ЕD-АV-6, kаtаlitik krekinq qurğularında bir sıra modernləşdirmə işlərinin aparılması nəzərdə tutulub.
İtaliyanın “Foster Wheller” firması tərəfindən 21 nömrəli ED-AV-6 qurğusunun məhsuldarlığının ildə 7,5 mln. tona çatdırılması və qurğunun daxili istilik potensialından daha səmərəli istifadə edilməsi, eləcə də ABŞ-ın UOP firması tərəfindən 55 nömrəli katalitik krekinq qurğusunun məhsuldarlığının ildə 2,5 mln. tona çatdırılması istiqamətində layihələndirmə başlanıb.
Eyni zamanda, ildə 100 min ton polietilen, 150 min ton polipropilen məhsulunun istehsalı üçün “Аzərikimya” İstehsalat Birliyinin xammalla təmin edilməsi diqqət mərkəzində saxlanılan məsələlərdəndir.
SOCAR-ın məlumatına əsasən, 2018-2019-cu illərdə şirkət UOP və digər şirkətlərin texnologiyası əsasında maye qazların təmizlənməsi, izomerləşdirilməsi üzrə qurğular, həmçinin benzin fraksiyalarının sulfid birləşmələrindən ayrılması üçün katalik krekinq qurğusu tikməyi planlaşdırır.
Qeyd edək ki, hazırda H.Əliyev ad. NEZ-in emal gücü ildə 5,5 mln ton nefti emal etməyə imkan verir.
