Azərbaycan Respublikası Dövlət Neft Şirkəti (SOCAR) tərəfindən 2014-cü ilin dekabr ayında dövlət büdcəsinə 148 milyon 309 min manat vəsait ödənilmişdir.
Caspian Barrel-in SOCAR-a istinadən verdiyi xəbərə görə, bu, 2013-cü ilin dekabr ayı ilə müqayisədə 61 milyon 284 min manat və ya 70,4 faiz çoxdur.
SOCAR 2014-cü ilin yanvar-dekabr aylarında büdcəyə 1 milyard 855 milyon 230 min manat vəsait ödənilmişdir ki, bu göstərici də ötən ilin müvafiq dövrü ilə müqayisədə 280 milyon 793 min manat və ya 17,8 faiz çox olmuşdur.
Qeyd edək ki, 2014-cü ildə SOCAR proqnozlara görə dövlət büdcəsinə 1 mlrd 825 mln manat vəsait köçürməliydi. Bu baxımdan SOCAR illik proqnoz öhdəliklərini 1,65% artıqlaması ilə yerinə yetirib.
Bundan əlavə, ötən ilin dekabr ayında SOCAR Dövlət Sosial Müdafiə Fonduna 11 milyon 706 min manat vəsait köçürmüşdür. Ümumiyyətlə, 2014-cü ilin yanvar-dekabr aylarında Şirkət tərəfindən Dövlət Sosial Müdafiə Fonduna ödəniş 141 milyon 240 min manat təşkil etmişdir.
Xatırlatmaq gərəkdir ki, Dövlət Neft Şirkəti 2014-cü ildə dövlət büdcəsi qarşısında olan proqnoz göstəriciləri, həmçinin 2013-cü illə müqayisədə oan artımları neftin qiymətinin azalması fonunda həyata keçirməyə müvəffəq olmuşdur.
Belə ki, 2013-cü ilin yekunlarına görə, 1 barel neftin orta ixrac qiyməti orta hesabla $109,7 təşkil etmişdisə, 2014-cü ildə bu göstərici $100-dan bir qədər artıq olmuşdur.
