Azərbaycan 2014-cü ildə 33 mln. 40 min 963,4 ton xam neft ixrac edib ki, bu da 2013-cü ilin göstəricisindən 3,6% azdır.
Caspian Barrel Dövlət Gömrük Komitəsininin məlumatlarına istinadən bildirir ki, 2014-cü ildə Azərbaycan boru kəmərləri ilə 32 mln. 122 min 455,2 ton neft ixrac edib.
Sayğacların göstəricilərinə əsasən, 2014-cü ildə Bakı-Tbilisi-Ceyhan neft kəməri ilə 26 mln. 871 min 531,5 ton, Bakı-Supsa neft kəməri ilə 4 mln. 232 min 675,7 ton, Bakı-Novorossiysk neft kəməri ilə 1 mln. 18,248 min ton neft ixrac olunub. Dəmir yolları ilə Gürcüstan limanlarına 918 min 508,2 ton neft daşınıb.
Komitənin məlumatına görə, hesabat ilində ixrac edilən $18 mlrd. 404 mln. 936,62 min məbləğində neftin bəyan edilmiş həcmi 23 mln. 611 min 888,95 ton təşkil edib. Bu məlumatdan çıxış edərək hesablamaq olar ki, 2014-cü ildə Azərbaycan orta hesabla 1 barel neftini $105,33-a ixrac edib.
Ancaq bu rəqəm nə qədər reallığı əks etdirir? Neft Araşdırmaları Mərkəzinin ekspertləri burada diqqəti bir məqama çəkirlər ki, London birjasının açıqlamasında 2014-cü ildə Brent markalı neftin 2014-cü il üçün orta qiyməti 1 barel üçün $99,29 bildirilmişdi. Məlumdur ki, Azərbaycan nefti adətən Brent markasından bir qədər baha, ən yüksək halda isə son dövrlər təqribən $1 çıvarında bahasına satılır. Bəs onda nədən belə bir fərq yaranır?
Caspian Barrel ekspertləri hesab edirlər ki, burada əsas məsələ Gömrük Komitəsinin məlumatlarındakı bəyan edilmiş neftlə ixrac edilmiş neft arasında olan fərqdədir. Belə ki, bəyan edilmiş neft sayğac göstəriciləri əsasında ixraca yönəldilmiş neftin cəmi 71,4%-i təşkil edib. Məsələ burasındadır ki, şirkətlərin nefti limanlardan FOB müqavilələri və ya CİF müqavilələrlə birbaşa alıcıya çatdırılması zamanı onun bəyan edilməsi prosedurası mueyyən zaman tələb edir (bu isə müqavilənin tipindən asılı olaraq iki aya qədər də vaxt apara bilər). Buna görə də ilin son rübündə demək olar ki, ixrac edilən partiyalar bəyan edilməyib və bu da real qiymətə öz təsirini sonradan göstərəcək.
Qeyd edək ki, 2013-cü ildə Azərbaycan öz neftini orta hesabla $110,06-dən ixrac etmişdi.
