2014-cü il ərzində “Azəriqaz” İstehsalat Birliyi (SOCAR-ın qaz paylayıcı strukturu) əhaliyə 2 473 576 546 kubmetr həcmində təbii qaz satıb və bunun qarşılığında vəsaitin toplanması 101,08 faiz təşkil edib.
Caspian Barrel SOCAR-a istinadən xəbər verir ki, 2014-cü il ərzində qeyri-əhali sektoru üzrə 2 018 529 148 kubmetr həcmində təbii qaz satılıb və qarşılığında 93,71 faiz vəsait toplanıb.
Bu o deməkdir ki, qeyri-əhali sektoru üzrə 6,29% ödəniş təmin edilməyib.
SOCAR daha sonra bildirir ki, 1 yanvar 2015-ci il tarixə olan məlumata görə, əhali sektoru üzrə 120 650 məcburi köçkün ailəsinin qazla təminatını həyata keçirib.
Məlumatda daha sonra bildirilir ki, 2014-cü il ərzində 84 757 yeni abonent qeydiyyata alınıb ki, bunun da 44 656-sı Bakı, Sumqayıt şəhərlərinin və Abşeron rayonunun, 40 101-i isə regionların payına düşüb.
Xatırladaq ki, Azərbaycanda bütün istehlakçılar (energetiklərdən başqa) istifadə etdikləri qazın 1000 kub metri üçün 100 manat (hazırkı bazar kursu ilə $127) ödəyir.
