Bakının Qaradağ rayonunda neft-qaz emalı və neft-kimya kompleksinin (OGPC) tikintisinin birinci mərhələsinin reallaşdırılmasına $8,45 mlrd. həcmində investisiya tələb olunacaq. Bu barədə SOCAR-ın strateji inkişaf üzrə vitse-prezidenti Tofiq Qəhrəmanov çərşənbə günü Bakıda “Neft-qaz emalı və neft-kimya kompleksi” layihəsinə həsr olunmuş II “NQNK Forumu”nda bəyan edib.
“Layihənin birnci mərhələsinə illik gücü 12 mlrd. kubmetr olan qaz emalı zavodunun tikintisi, illik gücü 860 min ton olan baza polimerlərinin (yüksək və aşağı sıxlığa malik polietilen və polipropilen) tikintisi üzrə zavodun, avtonom enerji bloku daxil olmaqla ümumi zavod təsərrüfatının tikintisi daxildir. Bu obyektlərin 2020-ci ildə istismara verilməsi planlaşdırılır”, – deyə Qəhrəmanov bildirib.
Onun sözlərinə görə, kompleksin tikintisi layihəsinin birinci mərhələsinin dəyəri $7 mlrd. həcmində qiymətləndirilir, bunun 30%-i dövlət vəsaiti, 70%-i borc vəsaitləridir. Bütövlükdə kreditlər üzrə faizlərin ödənişi nəzərə alınmaqla bu mərhələnin dəyəri $8,45 mlrd. təşkil edəcək.
Layihənin birinci mərhələsinin gəlirliliyi 20%-dən artıq, investisiyaların qaytarılması müddəti 4-5 ildir.
Qəhrəmanov vurğulayıb ki, PWC audit şirkətinin hesablamalarına görə, tikinti dövründə ОGPC layihəsinin reallaşdırılmasından iqtisadi səmərə $2 mlrd, fəaliyyət dövründə $225 mlrd. təşkil edəcək.
Vitse-prezident deyib ki, SOCAR-ın OGPC layihəsinin reallaşdırılması çərçivəsində apardığı əlavə tədqiqatlar onu optimallaşdırmağa və dəyərini aşağı salmağa imkan yaradıb. “Dəyişikliklər yeni NEZ-in istifadəyə verilməsi qrafiki ilə bağlı olub və onun 2030-cü ildə işə salınması planlaşdırılır. Bununla əlaqədar hazırda fəaliyyət göstərən Bakı neft emalı zavodunda müəyyən modernləşmə işləri aparılacaq. Bakı NEZ-də 7-8 yeni qurğunun tikintisi hesabına zavodun istismar müddətini daha 15 il uzatmaq mümkün olacaq”, – deyə o qeyd edib.
O vurğulayıb ki, SOCAR neft-kimya zavodu üçün xammal qismində naftadan istifadədən imtina etməyi və əvəzində qaz emalı zavodunda əldə olunacaq C2+ qaz fraksiyalarından istifadə etməyi planlaşdırır.
T.Qəhrəmanov əlavə edib ki, SOCAR Fransanın TOTAL şirkəti ilə “Abşeron” yatağında hasil ediləcək qazın OGPC-də emalı məsələsinə dair danışıqlar aparır. “Bu məsələnin texniki və kommersiya tərəfləri müzakirə edilir”, – deyə o qeyd edib.
