SOCAR-da iş başında növbəti bədbəxt hadisə qeydə alınıb. Hadisə nəticəsində iki nəfər həlak olub.
SOCAR-ın bu gün yaydığı məlumatda bildirilir ki, noyabrın 6-da “Azneft” İstehsalat Birliyinin N.Nərimanov adına Neft və Qazçıxarma İdarəsinin ərazisində yerləşən 310 və 312 saylı meydançalar arasındakı təqribən 60 metrlik estakadada uçqun baş vermiş, nəticədə estakadanın üzərindən keçən 250 mm diametlik neft xətti qırılmışdır.
Qəzanın daha böyük miqyas almaması məqsədi ilə NQÇİ-nin ərazidə olan 5 nəfər işçisi 307 saylı meydançaya gedərək təmir işləri aparmış, beləliklə, yanğının və neftin dənizə axma təhlükəsinin qarşısı alınmışdır.
Lakin geri dönərkən onların üzərində olduqları qəzalı meydança da uçmuş və onlar dənizə düşmüşlər.
Operativ xilasetmə tədbirləri nəticəsində 4 nəfər dənizdən çıxarılmışdır. Çıxarılanlardan Onlardan birinin həyatını xilas etmək mümükün olmamışdır. İtkin düşmüş 1 nəfərin -NQÇİ-nin təmirçi-çilingəri olmuş, 1971-ci il təvəllüdlü Yusipov Oqtay Nazim oğlunun axtarışı SOCAR-ın və FHN-in dalğıcları tərəfindən davam etdirilmiş, noyabrın 7-də saat 11.30 radələrində onun cəsədi dənizin dibindən tapılaraq sahilə çıxarılmışdır.
Hadisənin araşdırılması məqsədi ilə xüsusi komissiya yaradılmışdır.
Qeyd edək ki, N.Nərimanov adına Neft və Qazçıxarma İdarəsinin ərazisində yerləşən qəzalı meydançada oktyabr ayının 23-də təmir işləri aparan 41 nəfər neftçi qaz boru kəmərinin partlaması nəticəsində təhlükəli vəziyyətlə üzləşmişdilər. 37 nəfəri evakuasiya etmək mümkün olsa da, o zaman 4 nəfər dənizə yıxılaraq həlak olmuş və bir nəfərin cəsədi 8 gün sonra tapılmışdı.
