Heydər Əliyev Fondunun dəstəyi ilə Rumıniyanın paytaxtı Buxarestdəki Rumın-Amerikan Universitetində “Yeni beynəlxalq kontekstdə Azərbaycanın geosiyasi önəmi” mövzusunda elmi konfrans keçirilib.
Konfransda universitetin rəhbərliyi, müəllim-tələbə heyəti, Azərbaycanın Rumıniyadakı səfirliyinin əməkdaşları, Azərbaycan Respublikası Dövlət Neft Şirkətinin (SOCAR) Rumıniya nümayəndəliyinin təmsilçiləri, bu ölkədə yaşayan və təhsil alan həmvətənlərimiz iştirak ediblər.
SOCAR-ın mətbuat xidmətindən Caspian Barrel-ə verilən məlumata görə, konfransda çıxış edən şirkətin Rumıniya nümayəndəliyinin rəhbəri Həmzə Kərimov Azərbaycanın iqtisadi inkişaf təcrübəsindən danışıb.
Qeyd olunub ki, ümummilli lider Heydər Əliyevin “rəhbərliyi ilə 1994-cü ildə müstəqil Azərbaycanın iqtisadi inkişafının əsas konsepsiyası hesab edilən “Əsrin müqaviləsi”nin imzalanması ilə ölkəmiz dünyanın ən böyük neft dövlətlərindən birinə çevrilib. “Əsrin müqaviləsi”nin 20-ci ildönümü qeyd edildiyi gün isə Avropanın enerji xəritəsini dəyişəcək və 21-ci əsrin layihəsi adlandırılan “Cənub” qaz dəhlizinin təməli qoyulub. Bununla da Azərbaycan Avropanın enerji təhlükəsizliyində etibarlı tərəfdaş olduğunu bir daha təsdiqləyib.
Tədbirdə TAP, TANAP layihələri, Səngəçal və Kulevi terminalları barədə ətraflı məlumat verilib, beynəlxalq enerji sahəsində aparıcı oyunçulardan biri olan SOCAR-ın Rumıniyadakı fəaliyyətindən danışılıb. Qeyd edilib, bu ölkədə “SOCAR” brendi ilə fəaliyyət göstərən 30 yanacaqdoldurma məntəqəsində müştərilərə yüksək səviyyəli xidmət təklif edilir. Həmçinin, SOCAR Rumıniyaya investisiya yatıran 10 ən böyük şirkətin siyahısında yer alıb.
