İran İslam Respublikası statistikasına görə, 2014-cü ilin İran təqvimin 7 ayının nəticələrinə əsasən, Azərbaycandan idxal edilən məhsulun dəyəri $13,7 mln (+1,4%), Azərbaycana ixrac edilən məhsulun dəyəri isə $279,3 mln olub (-8,9%). Öz növbəsində Azərbaycan Gömrük Komitəsinin məlumatına əsasən, 2014-cü ilin 9 ayında Azərbaycandan İrana ixracın həcmi $28,4 mln, İrandan idxalın həcmi isə – $115,5 mln təşkil edib.
İranla ticarət dövriyyəsinin həcmi 2012-ci ildə $500 mln olmuşdusa, 2013-cü ildə bu göstərici 20%-dən çox azalmağağa doğru meyl etmişdi.
İranla ticarət əlaqələrinin azalmasına çox güman ki, Qərbin qoyduğu maliyyə və bank əməliyyatları sanksiyaları da öz təsirini göstərmişdir.
Qazaxıstan Xəzər regionunda hazırda Azərbaycanın ikinci ticarət tərəfdaşıdır. 2014-cü ilin 9 ayında Azərbaycan Stakomun məlumatına görə, Azərbaycanla Qazaxıstan arasında ticarət dövriyyəsi 34,3% azalib. Azərbaycandan ixrac $23,3 mln (-41%), idxal isə – $166,1 mln olub (33%). .
Qeyd edək ki, Azərbaycanla Qazaxıstan arasında ticarət dövriyyəsinin həcmi 2013-cü ildə $371 mln, 2012-ci ildə isə $390 mln təşkil etmişdi.
Türkmənistanla Azərbaycan arasında ticarət dövriyyəsinə dair son məlumatı bu il oktyabrın əvvəlində baş nazirin birnci müavini Yaqub Eyyubov hökumətlərarası komissiyanın iclasında səsləndirmişdi. Onun sözlərinə görə, 2013-cü ildə iki ölkə arasında ticarət dövriyyəsinin həcmi $82,3 mln olub. Cari il üçün hər hansı bir rəqəm bu iclasda mətbuat üçün açıqlanmayıb. Müqayisə üçün onu demək olar ki, 2008-ci ilin 9 ayının yekunlarına görə, iki ölkə arasında ticarət dövriyyəsi $488,6 mln-a çatmışdı. Bu o il idi ki, hər iki ölkənin dövlət başçıları qarşılıqlı səfərlər etmiş, iki ölkə arasında münbit iqtisadi əlaqələr yaranmağa başlamışdı. Ancaq sonradan birdən birə rəsmi Aşqabadın Bakını Xəzərin hüquqi statusu həllini tapmamış neft yataqlarını işləməyə görə Beynəlxalq İqtisadi Məhkəmə ilə hədələməsi ilə bu əlaqələr soyudu və təbii ki, iqtisadiyyatda da özünü göstərdi.
Rusiya Azərbaycanın Xəzəryanı ölkələr içərisində bir nömrəli ticarət tərəfdaşıdır. Cari ilin 9 ayının yekunlarına görə, Azərbaycanın Rusiya ilə ticarət dövriyyəsi $1,368 mlrd təşkil edib ki, bunun da cəmi $470,262 mln-u ixracın payına düşüb. Başqa sözlə, Rusiyaya ixrac Azərbaycanın ümumi ixracatında olan payının 2.7%-ni təşkil edib. Sözügedən dövrdə Rusiyadan idxal həcmi $897,794 mln olub ki, bu da Azərbaycanın ümumi idxalınin 13,8%-nə bərabərdir.
Xatırladaq ki, Azərbaycanın 2013-cü ildə Rusiya ilə ticarət dövriyyəsi $2,583 mlrd ($1,505 – idxal) olub. O zaman Azərbaycanın 14,1% ümumi idxalı bu ölkənin payına düşüb. Həmin il Rusiyadan idxal 9% artıb.
2012-ci ildə isə iki ölkə arasında ticarət dövriyyəsi $2,338 mlrd təşkil etmişdi ki, bunun da $1,378 mlrd-ı idxalın payına (ümumi idxalda xüsusi çəkisi 14,3%) düşmüşdü.
