Son 3 il ərzində Azərbaycanın Gürcüstana birbaşa xarici investisiyaları $400 mln.-u ötüb. Bu barədə Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov çərşənbə günü Bakıda keçirilən Azərbaycan-Gürcüstan biznes forumunda bildirib
“Azərbaycan Dövlət Neft Fondunun investisiyaları nəzərə alınmaqla 2006-cı ildən etibarən Gürcüstana $900 mln.-dan artıq investisiya yatırılıb, bu isə 7 mindən artıq iş yeri yaratmağa imkan verib”, – deyə R.Məmmədov qeyd edib.
Onun sözlərinə görə, Gürcüstanda 300-dən çox Azərbaycan şirkəti daimi əsasda fəaliyyət göstərir.
“Azərbaycanda Gürcüstan kapitalı ilə 194 şirkət qeydiyyatdadır. Onlar, əsasən xidmət, həmçinin nəqliyyat, kənd təsərrüfatı, energetika sektorlarında fəaliyyət göstərirlər”, – deyə R.Məmmədov vurğulayıb.
O, ölkələr arasında kənd təsərrüfatı, turizm, İKT, tikinti, sənaye, ekologiya sahələrində münasibətlərin inkişaf perspektivlərinin mövcud olduğunu qeyd edib.
