Londonda “Azərbaycan neft və qaz sənayesi: cari layihələr, perspektivlər və yerli biznesin inkişafı” adlı biznes-seminar keçirilib. Bu barədə SOCAR-ın (Azərbaycan Dövlət Neft Şirkəti) məlumatında qeyd olunur.
Biznes-seminarın təşkilatçısı qismində SOCAR-ın Böyük Britaniyadakı nümayəndəliyi çıxış edib.
Seminarda “BP”, “AMEC”, “Cameron International”, “Tenaris Global Services”, “Technip E&G” də daxil olmaqla 50-dən artıq şirkətin nümayəndələri iştirak ediblər.
Tədbirdə SOCAR-ın Böyük Britaniyadakı nümayəndəliyinin rəhbəri Rüfət Əfəndiyev Azərbaycanda investisiya mühiti, respublika iqtisadiyyatına investisiyaların perspektivləri barədə məlumat verib.
Seminar çərçivəsində “BP Global” şirkətinin satınalmalar üzrə rəhbəri Peter Roberts “BP-nin regionda fəaliyyəti, cari layihələr və perspektivlər”, “Penspen” şirkətinin baş layihə rəhbəri John Downer “Azərbaycan-Gürcüstan-Rumıniya” (AGRİ) qaz kəməri layihəsinin konsepsiyası”, “ERM” şirkətinin partnyoru Elena Əmirxanova “Azərbaycanda biznes fəaliyyəti” mövzusunda təqdimatlarla çıxış ediblər.
Məlumatda qeyd olunur ki, Enerji Sənayeləri Şurasının neft və qaz bölməsinin rəhbəri Neil Golding SOCAR-ın Böyük Britaniyadakı nümayəndəliyi ilə əməkdaşlığın genişləndirilməsində maraqlı olduqlarını ifadə edib.
