Benzinin qiymətləri dünya bazarında neftə görə artmayıb?

Avqustun 6-dan etibarən Azərbaycanda “Premium Euro-95” markalı benzinin qiyməti 4 qəpik artaraq 1 litr üçün parəkəndə satış qiyməti 0,97 manat olub. Buna səbəb nədir?

Caspian Barrel-in bazarda araşdırmaları göstərdi ki, yerli bazarda yüksək oktanlı benzinin qiymətinin artmasına səbəb 2 amillə bağlıdır. Birincisi, idxal olunan benzinin qiymətindəki artımlar və ikincisi, əvvəllər stimullaşdırıcı vergi yükünün nisbətən azaldılması.

Belə ki, 1 aprel tarixdən Ai-95 və Ai-98 markalı benzinlərin qiymətləri yerli bazarda artıq Tarif Şurası tərəfindən tənzimlənən mallar sırasından çıxarııb. O zaman bildirilmişdi ki, bunun nəticəsində azad bazar qanunları nəticəsində həmin məhsullar ölkəyə idxal olunacaq və rəqabət mühitində qiymətləri formalaşacaq. Ancaq stimullaşdırıcı hal kimi yanacağın idxalında və onun aksiz dərəcələrində kifayət qədər “endirimlər” edilmişdi ki, yerli bazarda birdən-birə Avropadakı kimi qiymətlər ortaya çıxmasın. Nəticədə, hətta Ai-98 markalı benzinin qiyməti 1,5 manatdan 1,03 manatadək ucuzlaşdı.

Azərbaycana idxal olunan yanacaq Batumdan müvafiq olaraq Yunanıstan və Rumıniya treyderlərindən alınır. Avropada iyul ayının ikinci hissəsindən avtomobil yanacağının qiymətində artım başlamışdı. Baxmayaraq ki, dünya bazarlarında neftin qiymətində enmələr müşahidə olunurdu. Bu da onunla əlaqədar idi ki, neftayırma zavodlarının əksəriyyətində iyun ayından başlayaraq plana uyğun təmir işlərinə start verilmişdi. Bu səbəbdən də qiymət artımı bütün Qərb bazarlarında özünü göstərirdi. Təkcə Gürcüstan bazarında artım ay ərzində 2 sentə yaxın olmuşdu.