Azərbaycan Respublikası Dövlət Neft Şirkətinin (SOCAR) birinci vitse-prezidenti, akademik Xoşbəxt Yusifzadənin rəhbərlik etdiyi nümayəndə heyəti İranın Xəzər Kəşfiyyat və Hasilat Şirkəti (KEPKO) rəhbərliyinin dəvəti ilə bu il avqustun 18-dən 20-dək İran İslam Respublikasında səfərdə olmuşdur.
SOCAR-ın yayadığı məlumatda bildirilir ki, Azərbaycan neftçiləri İranın Neft Nazirliyində, bu ölkənin neft və qaz şirkətlərində görüşlər keçirmişlər.
Akademik X.Yusifzadənin İranın neft nazirinin birinci müavini, İran Milli Neft Şirkətinin baş direktoru Rüknəddin Cavadi, İranın neft nazirinin beynəlxalq məsələlər və ticarət üzrə müavini Əli Məcidi və İran Milli Qaz Şirkəti baş direktorunun beynəlxalq məsələlər üzrə müavini, şirkətin qaz ixracı üzrə idarə heyətinin sədri Əzizulla Ramazani ilə görüşlərində neft və qaz sahəsində Azərbaycan – İran əməkdaşlığının vəziyyəti və perspektivləri, tərəflərin neft və qaz hasilatı, nəqli və ixracı sahəsində imkanları iki ölkə arasında mövsümi qaz nəqli və bir sıra digər məsələlər barəsində fikir mübadiləsi olmuşdur.
İranın Xəzər Kəşfiyyat və Hasilat Şirkətində keçirilən görüşdə şirkətin baş direktoru Əli Osuli akademik X.Yusifzadəni və nümayəndə heyətinin üzvlərini – SOCAR Baş ofisin Qazma şöbəsinin rəisi Farhad Ağamoğlanovu, Qaz İxrac İdarəsi rəisinin markentinq üzrə müavini Kamal Abbasovu, Geofizika və Geologiya İdarəsinin rəis müavini Yusif Şıxəliyevi, Baş ofisin Geodeziya və hidroqrafiya şöbəsinin böyük geodezisti Vadim Abramenkonu, eləcə də Dövlət Neft Şirkətinin İran nümayəndəliyinin rəhbəri Oqtay Sadıqzadəni KEPKO-nun tarixi və beynəlxalq əlaqələri ilə taniş etmişdir.
O, rəhbərlik etdiyi şirkətin SOCAR ilə Xəzərdə əməkdaşlıqda maraqlı olduğunu bildirmişdir. Tərəflər Xəzərdə və beynəlxalq neft-qaz layihələrində Azərbaycan – İran əməkdaşlığının ölkələrimizin mənafeyi naminə daha da genişlənməsinin əhəmiyətini vurğulamışlar.
SOCAR-ın nümayəndə heyəti Tehranda elmi-tədqiqat neft sənayesi institutuna da dəvət edilmiş, burada iranlı alimlərin neft-qaz və nanotexnologiyalar sahəsində araşdırmaları ilə tanış olmuşdur.
Azərbaycan neftçilərinin iranlı həmkarları ilə səmimilik və işgüzarlıq şəraitində keçən görüş və danışıqlarının sonunda qarşılıqlı Anlaşma Memorandumu imzalanmışdır.
