SOCAR artıq 3-cü ildir ki, Azərbaycan mədəniyyətinin təbliği məqsədi ilə beynəlxalq musiqi tədbirləri sırasında xüsusi yer tutan Montrö Caz Festivalı ilə tərəfdaşlıq edir.
İyulun 6-da bu ilki Montrö Caz Festivalı çərçivəsində Azərbaycanın adından ziyafət təşkil edilmişdir.
SOCAR-ın ayadığı məlumata görə, gecədə İsveçrədə fəaliyyət göstərən yerli və beynəlxalq şirkətlərin nümayəndələri, həmçinin ictimai-siyasi xadimlər, Möntrö Caz Festivalının icraçı direktoru Matyö Jaton, Ümumdünya İqtisadi Forumunun Tədbirlər və xidmətlər üzrə baş direktoru Jan Lu Deneria, İsveçrə Baş Assambleyasının Xristian Demokrat Partiyasından olan üzvü, nüfuzlu siyasətçi Filippo Lombardi, UEFA-nın nümayəndəsi David Petriaşvili və başqaları iştirak etmişlər. Gecədə Azərbaycanın əməkdar artisti Emil Əfrasiab konsert proqramı ilə çıxış etmişdir.
Həmin gün Montrö Caz Festivalı çərçivəsində tanınmış muğam ustası, Xalq artisti Alim Qasımovun konserti də keçirilmişdir. Festivalın proqramına uyğun olaraq artıq 1 ay öncədən elan edimiş konsertə maraq həddən artıq böyük olmuşdur. Anşlaqla keçən konsertdə Azərbaycan muğamı tamaşaçılar tərəfindən böyük maraqla qarşılanmışdır.
Azərbaycan mədəniyyətinin təbliği qarşıdakı günlərdə də festival tədbirləri ilə davam edəcəkdir. Belə ki, 9,16 və 17 iyul tarixlərində İsfar Sarabski, ”Natiq-ritm” qrupu və ”Rast” qrupunun konsertləri, həmçinin nağara və balaban üzrə ustad dərslərinin keçirilməsi nəzərdə tutulmuşdur.
