Heydər Əliyev adına Bakı neft emalı zavodunda (BNEZ) yeni layihənin – 54 nömrəli qurğuda doymuş amin məhlulunun regenerasiya blokunun tikinti-quraşdırma işlərinə başlanılıb.
SOCAR mətbuat xidmətinin yayadığı məlumatda bildirilir ki, bu istiqamətdə mexaniki, elektrik və nəzarət-ölçü cihazları sahələri üzrə quraşdırma-sazlama işləri davam etdirilir.
Qurğuda texnoloji prosesin idarə edilməsi HS 900 tipli avtomatik idarəetmə sistemi ilə həyata keçiriləcək.
Həmin işlərin reallaşması üçün qurğuda yeni alınmış sərf, təzyiq, səviyyə və temperatur vericiləri, eləcə də tənzimləyici klapanlar quraşdırılacaq. Sahə cihazları ilə sistem arasında əlaqə xətləri yerləşdirmək üçün artıq mühafizə novları quraşdırılıb.
Hazırda operator zalında HS-900 tipli kotrollerin yerləşəcəyi otağın rekonstruksiyası, tənzimləyici klapanların və səviyyəölçən cihazların quraşdırılması işlərinə başlanılıb. Qurğuda həyata keçirilən işlərin avqustun 20-dək başa çatdırılması nəzərdə tutulur.
Bundan başqa, H.Əliyev adına BNEZ-də 31 nömrəli katalitik riforminq qurğusunda da müasir tipli avtomatik idarəetmə sisteminin tətbiqi üzrə cihaz və avadanlıqların yeniləri ilə əvəz olunmasına başlanılıb. Hazırda bu istiqamətdə işlər uğurla davam etdirilir.
Qeyd edək ki, BNEZ yanacaq istehsalı üzrə ixtisaslaşır.
