2014-cü ildə Azərbaycanda 41,2 milyon ton neft və 28,8 milyard kubmetr qaz hasil edilməsi nəzərdə tutulur. Neftin 1,65 milyon tonu,qazın isə 1 milyard kub metri ixrac ediləcək.
Bu barədə SOCAR-ın Neftin, qazın hasilatı və nəqli üzrə vitse-prezidenti Rəhman Qurbanov deyib.
O bildirib ki, bilavasitə SOCAR üzrə işlənmədə olan yataqlardan 8,4 milyon ton neft və 7 mlrd. kubmetr qaz hasil edilməsi planlaşdırılır. SOCAR-da hasil edilməsi planlaşdırılan neftin 6,7 milyon tonu emala yönəldiləcək. Hasil edilməsi planlaşdırılan qazın 5,3 mlrd. kubmetri isə “Azərenerji”yə veriləcək.
“AÇG yataqları üzrə 30,6 milyon ton neft və 12,4 milyard kubmetr qaz, Şahdəniz yatağından isə 2,3 milyon ton kondensat və 9,4 mlrd. kubmetr qaz hasil edilməsi gözlənilir” – deyə Qurbanov bildirib.
Onun sözlərinə görə,“Şahdəniz” yatağından hasil edilməsi planlaşdırılan qazın 2,1 mlrd. kubmetri Azərbaycana, 6,4 mlrd. kubmetri Türkiyəyə, 700 mln. kubmetri isə Gürcüstana veriləcək. Bununla yanaşı AÇG yatağından hasil edilən qazın 2,4 mlrd. kubmetri Azərbaycana, 8,6 mlrd. kubmetri lay təzyiqinin saxlanması üçün laya vurulacaq”.
