Aprelin 8-də SOCAR prezidenti Rövnəq Abdullayev və emal üzrə vitse-prezidenti Davud Məmmədov Heydər Əliyev adına Bakı neft emalı zavodunda olmuş, katalitik riforminq və koks qurğularının təmir olunub istismara buraxılması ilə maraqlanmış, məsləhətlərini vermişlər.
SOCAR-dan Caspian Barrel-ə verilən məlumara görə, Heydər Əliyev adına BNEZ-in katalitik riforminq qurğusunda təmir işlərinin aparılmasında məqsəd qurğunun bəzi bölmələrinin iş rejiminin tam gücü ilə bərpasına nail olmaq idi. Əsas işlər qurğunun DR-211 reaktorunda görülmüşdür. Bu məqsədlə reaktorun daxilindəki hissələr sökülərək təmizlənmiş və yenidən yığılmışdır. BN-211, 212, 213, 214 sobalarında da mühüm işlər yerinə yetirilmişdir. Sobaların boruları təmizlənmiş, oda davamlı kərpiclər bərpa olunmuş, müvafiq izolyasiya işləri aparılmışdır.
Həmçinin sobalarda istilik itkisinin qarşısının alınması üçün sıradan çıxmış metal örtüklər dəyişdirilmiş, digər zəruri işlər görülmüşdür. Təmir vaxtı istehsalatın ərazisində DB-11 xammal tutumu, DB-121 və DB-821 separatorları da təmizlənmişdir. 10 gün davam edən təmirdən sonra qurğu artıq rejimə çıxmışdır. Koks istehsalı üzrə 43 №-li qurğunun birinci axınının təmirinin əsas səbəbi isə 301/1 sobasındakı ilanvari borularda təzyiqin normadan yuxarı olması idi.
Qurğunun birinci axını təmirə saxlanıldıqdan sonra ilanvari borularda yığılıb qalmış koks buxar-hava qarışığı ilə yandırılmışdır. Yararsız hesab edilən 5 ədəd boru dəyişdirilmiş, həmin müddətdə 1-ci axında olan buraxılışlar da aradan qaldırılmışdır. Təmir başa çatdıqdan, qurğunun kipliyi və möhkəmliyi yoxlanıldıqdan sonra, 1-ci axın reqlamentə uyğun olaraq işə buraxılmışdır. Hazırda bu qurğu normal rejimdə istismardadır.
