Fevralın 25-də Dövlət Statistika Komitəsinin inzibati binasında 9-cu regional JODİ təlim seminarı işinə başlayıb. Tədbirdə 11 xarici ölkənin statistika təşkilatlarından və 6 beynəlxalq təşkilatdan ümumilikdə 40-a yaxın mütəxəssis iştirak edir.
Tədbiri giriş sözü ilə açan Dövlət Statistika Komitəsi sədrinin müavini Yusif
Yusifov cari seminarın əvvəlki dövrlərdə aparılmış tədbirlərlə əlaqəsi, məqsədi, seminarın gündəliyi haqqında tədbir iştirakçılarına məlumat verib.
O bildirmişdir ki, JODİ konkret olaraq enerjinin istehsalı və istehlakı üzrə proseslərin nəticələrini xarakterizə edir və bu təşəbbüs 100-ə yaxın ölkələrdən neftin təchizatı və tələbatına dair göstəricilər üzrə məlumatları toplamaqdan ibarətdir.
Eyni zamanda qeyd edilmişdir ki, Enerji məlumatlarının keyfiyyətinin artırılması məqsədilə Beynəlxalq Enerji Forumu katibliyi və JODİ tərəfdaş təşkilatları (Asiya və Sakit okean ölkələri üzrə İqtisadi Əməkdaşlıq, Avrostat, Beynəlxalq Enerji Agentliyi, Latın Amerikası Enerji Təşkilatı, OPEC, BMT-nin Statistika Şöbəsi) müntəzəm olaraq neft və qaz məlumatlarını toplayan mütəxəssislər üçün regional təlim seminarları keçirir. İndiyədək JODİ tərəfdaşları 8 regional təlim seminarı keçirmişdir.
Seminar JODİ üzrə ümumi məlumat, mövqe və məqsədlər, genişləndirilmiş JODİ sorğu vərəqi, məlumat istifadəçilərinin perspektivləri, məlumatların toplanılması, keyfiyyəti, qiymətləndirilməsi texnikası mövzularını əhatə edəcəkdir.
Seminar fevralın 27-dək davam edəcək.
