Rusiyanın “RIA-Reyring” agentliyi 2014-cü ilin əvvəlinə Avropa İttifaqı ölkələri və bəzi MDB ölkələrində avtomobil yanacağınin qiymətləri cədvəlini yeniləyib və bu ölkələrdə orta əmək haqqı ilə Ai-95 markalı benzin arasındakı mütənasibə nəzər salıb.
Bu çox böyük bir cədvəldir, ona görə də Caspian Barrel bunlar arasından Azərbaycan üçün maraq kəsb edənləri seçib oxucuların diqqətinə çatdırır.
Ilk növbədə benzinin ən bahalı olduğu 5 ölkəyə nəzər salaq: bunlar Norveç (1 litri yanvar ayının kursu ilə 1,82 AZN və 2013-cü ilin əvvəli ilə müqayisədə benzinin qiymətlərində 3,5% artım müşahidə edilib), İtaliya (1,8 AZN, qiymətlər 1,3% azalıb), Niderland (1,76 AZN, qiymətlər 2,2% azalıb), Yunanıstan (1,73 AZN, qiymətlər 1,7% azalıb) və Danimarkadır (1,72 AZN, qiymətlər 2,1% azalıb).
Maraqlıdır bəs bu ölkələrdə orta əmək haqqına insanlar nə qədər Ai-95 markalı benzin ala bilərlər? Son hesablamaların nəticələri aşağıdakı kimi olub:
Norveç – 2296 litr
İtaliya – 964 litr
Niderland – 1553 litr
Yunanıstan – 754 litr
Danimarka – 1635 litr
Keçmiş Sovet ölkələrinə gəldikdə isə “RIA-Reyring”in cədvəlinə ancaq Rusiya Federasiyası, Belarus və Qazaxıstan kimi ölkələr düşüb. Rusiyada benzinin Ai-95 markali benzinin 1 litri 0,8 AZN təşkil edib, Belarusda – 0,82 AZN, Qazaxıstanda isə 0,72 AZN.
Bu ölkələrdə orta əmək haqqına düşən benzin həcmləri isə belə olub:
Rusiya – 717 litr
Belarus – 346 litr
Qazaxıstan – 638 litr
Azərbaycan – 536 litr*
* Azərbaycanda Dövlət Statistik Komitəsinin sonuncu məlumatına görə orta əmək haqqı 428,8 manat təşkil edib və bizim hesablama bunun əsasında aparılıb.
Qeyd edək ki, yanacağın bahalı olması Qərbdə iqtisadiyyat üçün də fəlakət deyil, əgər ölkə bazar iqtisadiyyatı relsləri üzərində hərində hərəkət edirsə və sağlan rəqabət höküm sürür, ölkədə qanunlara əməl edilirsə. Çünki məhz sağlam rəqabət nəticəsində tezliklə bahalı yanacağın fəsadlarının minimuma endirilməsinin yolları tapılır. Azərbaycan vətəndaşlarının çoxu bunu qonşu Türkiyəyə səfərləri zamanı açıq-aşkar hiss edirlər. Orada avtomobil yanacağının qiyməti Azərbaycandan 3 dəfə bahadır, ancaq istehsal edilən mallar, göstərilən xidmətlər, o cümlədən taksi xidmətləri bizim ölkədən ucuzdur.
