İtaliya bu il Azərbaycandan 7,4 milyard kubmetr qaz alacaq

Azərbaycan 2022-ci ildə İtaliyaya 7,4 milyard kubmetr qaz ixrac edəcək. Bu barədə energetika naziri Pərviz Şahbazov “Twitter”də yazıb.

“İtaliyanın ekoloji keçid nazirinin müavini Vannia Gava ilə Trans-Adriatik qaz kəmərinin (TAP) bu ölkənin qaz istehlakına töhfələrindən bəhs etdik. Bu il İtaliyaya 7,4 milyard kubmetr qaz ixrac ediləcək”, – deyə nazir paylaşımında bildirib.

“İnterfaks-Azərbaycan” agentliyi xəbər verir ki, Beynəlxalq Enerji Agentliyi (IEA) 2022-ci ildə TAP-la Azərbaycandan Avropaya qaz ixracının 10 milyard kubmetrə çatacağını proqnozlaşdırır.

Daha əvvəl TAP AG şirkəti bildirmişdi ki, 2020-ci il dekabrın 31-dən 2021-ci il dekabrın 31-dək TAP qaz kəməri ilə Avropaya 8,1 milyard kubmetr Azərbaycan qazı ixrac edilib. Bu həcmin 6,8 milyard kubmetrdən çoxu İtaliyaya, 1,2 milyard kubmetrə qədəri Yunanıstana və Bolqarıstana tədarük edilib.

Azərbaycan qazının TAP kəməri ilə İtaliya, Yunanıstan və Bolqarıstana ixracına 2020-ci il dekabrın 31-də başlanılıb.

TAP-ın ümumi uzunluğu 878 km təşkil edir, bunun 550 km-i Yunanıstanın şimal hissəsindən, 215 km-i Albaniyadan, 105 km-i Adriatik dənizindən, 8 km-i isə İtaliya ərazisindən keçir. TAP Azərbaycan qazının Avropaya nəqli üçün infrastrukturun yaradılmasını nəzərdə tutan CQD layihəsinin sonuncu komponentidir.

Qaz kəməri “Mərhələ-2” çərçivəsində “Şahdəniz” yatağından hasil edilən 10 milyard kubmetr təbii qazın Yunanıstan və Albaniyadan Qərbi Avropaya nəqlini nəzərdə tutur. Kəmərin ötürmə qabiliyyəti onun gücünü iki dəfə – ildə 20 milyard kubmetrə qədər artırmağa imkan verir.

Layihənin səhmdarları SOCAR (20%), BP (20%), “Snam” (20%), “Fluxys” (19%), “Enagas” (16%) və “Axpo” (5%) şirkətləridir. Layihənin dəyəri 4,5 milyard avrodur. TAP-ın təməlatma mərasimi 17 may 2016-cı il tarixində Yunanıstanda keçirilib.

interfax