Azərbaycan

SOCAR AQŞ ADNSU-da karyera sərgisində iştirak edib

SOCAR AQŞ Azərbaycan Dövlət Neft və Sənaye Universiteti tərəfindən təşkil olunmuş Karyera sərgisində iştirak etmişdir.

Tədbirin keçirilməsində məqsəd tələbələr üçün işəgötürənlərlə ünsiyyət qurmaq və karyera imkanları haqqında məlumatlanmaq fürsəti yaratmaq idi.

Caspian Barrel-ə SOCAR AQŞ-dən verilən məlumata əsasən, ADNSU-nun Karyera mərkəzinin açıqlamasına görə, tədbir müxtəlif fakültələrdən olan 3000-ə yaxın tələbə və məzunları, eləcə də neft-qaz, telekommunikasiya, bank və iqtisadiyyatın digər sahələrində fəaliyyət göstərən nüfuzlu yerli və beynəlxalq şirkətləri bir araya gətirmişdir.

SOCAR AQŞ də ADNSU-da keçirilmiş karyera sərgisinə qatılmışdır. Şirkət təmsilçiləri yüzlərlə iştirakçı ilə ünsiyyət qurmuş və onları şirkətdə olan mövcud vakansiyalar və yay təcrübə proqramı ilə əlaqədar məlumatlandırmışlar. Tələbələr birinci və ikinci kurslarda təhsil alanlar üçün təcrübə proqramı və həmçinin təhsilini bitirdikdən sonra təcrübəçi qismində işləmək imkanları haqqında ətraflı məlumat əldə ediblər. Onlar təcrübə proqramının praktiki faydaları haqqında da məlumatlandırılıblar.

Tədbir iştirakçıları arasında olan Azərbaycan Dövlət Neft və Sənaye Universitetinin rektoru Professor Mustafa Babanlı SOCAR AQŞ-nin kollektivinə universitetə ayırdıqları diqqətə görə təşəkkür etmiş və vurğulamışdır: “Biz Sizi daima öz tədbirlərimizdə görməyə şadıq. Sizin bizə göstərdiyiniz diqqətə və tələbələrimizin potensialına olan inamınız üçün sizə minnətdarıq. Ümid edirik ki, bu münasibətlər qarşıdakı illərdə də davam edəcək.”

Qeyd edək ki, SOCAR AQŞ inkişaf etməkdə olan müəssisə kimi yerli universitetlərlə əməkdaşlıq etməyi, tələbə və məzunların müxtəlif işlərə cəlb olunmasını planlaşdırır.

Xatırladaq ki, Azərbaycan Dövlət Neft və Sənaye Universiteti tərəfindən təşkil olunmuş Karyera sərgisi 22 dekabr 2018-ci il tarixində keçirilmişdi.

Hal-hazırda SOCAR AQŞ dayaz sulu ‘’Günəşli ‘’yatağında yerləşən  7 və 11 saylı, “Qərbi Abşeron” yatağının 20 saylı, ‘’Ümid’’ yatağının 1 saylı və  ‘’Bulla’’ yatağında  6 saylı Dərin Dəniz Stasionar Özüllərində (DDSÖ) qazma işləri aparır.

Bundan əlavə, 2018-ci ilin fevralında SOCAR AQŞ Banqladeşdə qaz yataqlarının kəşfi məqsədi ilə keçirilən qazma əməliyyatlarında tenderin qalibi olub. Tenderin nəticələrinə əsasən, SOCAR AQŞ 2 kəşfiyyat və 1 qiymətləndirmə quyularıının qazılmasını həyata keçirməlidir. Layihəsin icrasına 2018-cı ilin aprelindən start verilib.